obituario

A Rafael Cuñarro

25.08.2015 | 03:04

Cando as últimas notas dunha obra chegan ao seu fin, o auditorio imprégnase deses sons, nun momento máxico no que toda a Música se apodera dos nosos corazóns.Rafael Cuñarro García, o señor Rafael para a familia da Banda de Lalín, vén de tocar as súas últimas notas, de empregar o seu último alento para lembrarnos todas e cada unha das leccións que del puidemos aprender. Con máis de oito décadas ás súas costas foi quen de manter a trompeta nos beizos ata os últimos compases convertíndose non so no músico máis veterán da nosa agrupación senón en todo un emblema para a vila de Lalín pola súa paixón, enerxía e ilusión. Nunca desaproveitou un momento de descanso nos ensaios, despois dun pasarrúas, mentres agardabamos para a procesión ou antes de comezar un concerto para arrincarnos un sorriso contándonos as súas andanzas polo mundo adiante ou aconsellándonos sobre os segredos da felicidade. Nas súas historias adiviñábase o valor de quen loitou lonxe da terra pola prosperidade da súa familia, a mesma entrega e dedicación coa que nos agasallaba a todos coa consciencia de que as forzas ían a menos pero coas ilusións intactas e unha vitalidade desbordante. Nestes momentos duros queremos arroupar á súa familia e abrazalos co sentimento co que Rafael nos contaxiou. Quixeramos ter esa palabra de ánimo que el sempre atopaba e transmitirlles o noso agarimo e o orgullo polo que a súa figura representou, representa e representará ata o fin dos tempos na nosa historia e nas nosas vidas. A Banda de Lalín perde a un músico, a un amigo, a un pai, pero todo o que vivimos co señor Rafael non fixo se non enriquecernos e facernos mellores e por iso a nosa lembranza hacia el sempre estará presidida por un gran, profundo e sincero sorriso.

Descanse en Paz.

A Familia da Banda de Lalín.

Compartir en Twitter
Compartir en Facebook
Enlaces recomendados: Premios Cine