Segundo un dito moi vello, de feitos raros obtéñense, tamén, resultados raros. Todo isto vén a conto co sucedido no castro de Cortegada, porque os resultados da destrucción parcial dunha parte do terraplén do antecastro inferior son a consecuencia inmediata dunha planificación urbanística mal xestionada e manipulada, posiblemente, de forma intencionada. Non se pode empregar como argumento válido para xustificar a actuación destructiva habida neste xacemento arqueolóxico, a prolongada vixencia do plan urbanístico de 1981, aínda que este PXOM sexa anterior á entrada en vigor da Lei 8/1995 de Patrimonio Cultural de Galicia. A Lei de Patrimonio Cultural está por encima de calquera PXOM e o castro de Cortegada atopábase debidamente catalogado pola Xunta de Galicia, desde 1989, coa referencia GA36052044.
No suposto de que unicamente se tivera en conta o PXOM de 1981 para actuar nos terreos do castro de Cortegada, convén ter en conta que no artigo 102 recoñécese como Solo Non Urbanizabe de Proteccion Especial (SNUPE), o correspondente a predios rústicos de situación pintoresca ou recordo histórico (condición que cumpre sobradamente este castro). No artigo 105 deste PXOM, tamén se establece á necesidade de redactar, por parte do concello, plans especiais de protección naqueles espazos que reunan condicións especiais, incorporándoos a un catálogo específico do que formaban parte, inicialmente (1981) o Mosteiro de Carboeiro, a igrexa de Martixe, a igrexa de Breixa, a ponte románica de Taboada e a fervenza do río Toxa. Logo, se o Concello de Silleda non desenvolveu adecuadamente o seu propio PXOM a medida que entraban en vigor leis e decretos lexislativos, ao tempo que a Consellería de Cultura catalogaba o patrimonio galego, non poden eludir responsabilidades por culpa do seu anquilosamento.
Calquera persoa pode consultar a páxina web do Concello de Silleda, na que está colgada a acta da sesión extraordinaria da xunta de goberno local do 23-10-2014, onde se aproba por unanimidade o proxecto de rehabilitación superficial do vial e senda peonil no lugar de Santa María de Cortegada. Nesa mema acta tamén aparecen as siglas do arquitecto que elaborou dito proxecto, quen, a súa vez, é nomeado director das obras. Indícase todo isto porque o señor alcalde de Silleda pode disculparse dicindo que o concello tan só se limitou a executar o proxecto aprobado e nel, supostamente, non se poñían limitacións ao respecto, nin se mencionaban afectacións ao castro de Cortegada.
E se todo isto resulta certo, porque unicamente se tivo en conta o paralítico plan de ordenación de 1981, tamén hai que ter en conta que os danos producidos non afectaron tan só ao castro, senón, tamén, a outros bens da igrexa parroquial, como era o vello valado que recorría unha gran parte da pista ata chegar á propia igrexa (muro tradicional nun rueiro).