tRIBUNA LIBRE

Sobre os meus bens

16.05.2013 | 07:37
Sobre os meus bens
Sobre os meus bens

En Lalín coñecémonos todos e todos sabemos quen se adicou e se adica a traballar e a aforrar e quen a despilfarrar. Eu levo máis de 30 anos traballando arreo e implicándome a fondo en todos os proxectos que a vida me foi ofrecendo e dos que estou moi orgulloso. Primeiro, poñendo a funcionar unha boa explotación de vacún na casa dos meus pais, que teñen uns bos bens como saben os veciños; despois, cofundando a cooperativa Aprodeza, da que fun presidente moitos anos. Antes de cumprir os trinta anos iniciei unha carreira política que me levou a ser concelleiro un par de anos e alcalde os últimos 23, dos que prácticamente vinte fun tamén vicepresidente da Deputación -sendo hoxe o deputado máis veterano, agás o nacionalista César Mosquera- e catro presidente da Fegamp -cargo no que me gañei con esforzo e moito traballo, e non é falsa modestia, o respecto dos compañeiros de todas as cores políticas-.

Meus pais ensináronme moitas cousas, pero sobre todo a importancia do esforzo, do traballo e de aforrar os cartos que tanto custa gañar e a non malgastalos. Aqueles que me coñecen, que despois de 23 anos de alcalde non son poucos, saben que levo unha vida totalmente austera e tamén coñecen que o meu compromiso con Lalín e coa Alcaldía déixame moi poucos momentos libres para poder gastar e adicarme a luxos e á vida social.

As miñas retribucións nos organismos públicos ao longo de máis de 25 anos de carreira política non son ningún segredo. O meu soldo como alcalde sempre o coñeceron os lalinenses porque raro é o ano en que un par de veces ou tres non o reflictan os medios de comunicación, que sempre tiveron acceso ao meu salario, que é público. Da Deputación cobrei e cobro o mesmo ca calquera dos deputados, sexa cal sexa o partido ao que pertenzan. Unha remuneración que nunca escondín.

Na campaña electoral remitínlle aos lalinenses a miña nómina como alcalde, con 2.400 euros líquidos ao mes, que é a verdade tanxible do que percibo do Concello, sen negar nunca os meus ingresos como deputado. O que teño aforrado ao longo de 30 anos, un tercio da miña vida laboral na explotación de meus pais e dous tercios na vida pública, moitísimas veces sen a penas tempo para adicarlle nin á familia e moitos anos sen poder coller nin unha semana de vacacións, está perfectamente detallado na miña declaración de bens e calquera insidia, como a que tentan levantar os socialistas, rexéitoa de raíz. Os bens que realmente teño son unha casa, uns aforros e un plan de pensións, detallados na declaración que fixen á Deputación e que calquera pode consultar.

Semella que o PSOE de Lalín non me perdoa seis derrotas consecutivas, algunha tan dolorosa como a última na que contaban acadar uns resultados históricos e o que conseguiron coa súa política da difamación, falsidades e rancor foi que subísemos un concelleiro. Tentar menoscabar a miña imaxe con insidias cando en Lalín todos sabemos de que pé coxea cada un, quen aforra e quen non e a quen lle preocupa Lalín e non outros intereses. É cansino que saquen a relucir unha vez máis o coche da alcaldía que, como todo o mundo sabe, se mercou usado -o que xa se estaba utilizando- por pouco máis de 20.000 euros. Ten case seis anos e é realmente unha ferramenta de traballo que funciona como unha extensión do meu despacho.

Non vou polemizar máis co PSOE sobre o tema porque semella que o único que lles interesa é erosionar de maneira pouco ortodoxa a imaxe do rexedor, en vez de facer propostas aos problemas reais dos lalinenses. Como ben saben, traballei toda a miña vida política tendo como obxectivo primordial e prioritario o mellor para os veciños aos que represento. Síntome orgulloso da sabiduría do pobo de Lalín e do traballo como alcalde. É unha vantaxe grande que nos coñezamos todos, polo que o que se di dende calquera grupo político os veciños saben perfectamente como valoralo.

*Alcalde de Lalín

Enlaces recomendados: Premios Cine