TRIBUNA LIBRE

Contra a política caciquil e enchufista

Eladio Osorio Montenegro (*)

24.03.2013 | 11:05

O PSdeG de Ourense leva máis de dúas décadas denunciado a política caciquil e enchufista do PP e de Baltar, tanto na Deputación como noutros órganos nos que gobernan. Sempre foi, cos distintos portavoces que por esta institución pasaron, a punta de lanza na loita contra as relacións de compra-venda de favores que instauraron.

Estes feitos acontecen cando uns os fan e hai outros que miran cara outro lado. Foron moitas as veces que nos sentimos sos nesta loita, e que botamos en falta a implicación doutros axentes sociais da provincia ourensá, pero alá cada quen coa súa conciencia.

No ano 2010 demos un salto cualitativo: fartos de que as denuncias políticas non serviran para nada, acudimos á fiscalía para poñer no seu coñecemento todas as irregularidades en materia de contratación.

Porque, falemos con sinceridade, alguén cre é normal que a Deputación de Ourense dilapide ó redor do 50% do seu orzamento en persoal? Alguén cre que é normal que chegara a contar con máis de 1000 traballadores/as? Alguén cre que é normal que en vésperas electorais ou congresuais se realicen centos de contratos? Alguén cre que é normal que houbese máis de 300 persoas vinculadas con cargos electos traballando nesta institución? Alguén cre que o anormal nesta "casa" sexa non ter o carné do PP?

Todos estes feitos son os que leva denunciando o PSdeG e o que escribe estas liñas dende hai anos mentres outros calan e outorgan.

Curiosamente, cando os socialistas poñemos estes feitos en mans da Xustiza, o Partido Popular inicia unha cruzada contra os traballadores/as do Grupo Socialista, chegando incluso a despedirnos e véndose na obriga de readmitirnos a posteriori.

Os traballadores/as do grupo socialista XAMAIS pretendemos ser fixos nesta Deputación, contrariamente ás informacións que o PP está difundindo nos medios. Quere equipararnos coa súa famosa frase de "Todos somos iguais", pero equivócase. Nós só pretendemos manter as condicións laborais coas que iniciamos os contratos e que Baltar cambiou unilateralmente tratando de causar prexuízo ó Grupo Socialista e mermar os dereitos que legalmente adquirimos.

Seguiremos traballando ó servizo do grupo socialista mentres este o estime oportuno, pero non ata cando queiran os reis do caciquismo. As mafias sempre intentaron acalar, de moi diversos modos, a aqueles que eran críticos e contrarios a elas. Parece que o PP quere facer o mesmo con nós, pero podo asegurarlles que nunca o conseguiran.

Hai pouco denunciamos que todos os deputados do PP a excepción dun tiñan familiares ou afíns traballando na Deputación. A día de hoxe ninguén rebateu tal afirmación. Habería que preguntarse en que condicións entrou a exmuller de José Manuel Baltar, os fillos do portavoz do PP, o excuñado de Rosendo Fernández, e un longo etcétera.

Os socialistas fomos sempre o martelo pilón contra a política enchufista e caciquil de Baltar e do seu fillo. Este é o noso delito. Seguiremos denunciando, aínda que nos ameacen e intenten manipular a opinión pública. Unha cousa é segura: nós non somos coma eles, xamais seremos traballadores fixos da Deputación; porque somos socialistas, íntegros, e porque ademais nos daría noxo.

* Secretario de política municipal del PSdeG-PSOE en Ourense y asesor del grupo provincial socialista en la Diputación

Enlaces recomendados: Premios Cine