Na Universidade de Vigo temos sorte de contar con dous bos candidatos cara as vindeiras elecións. Dúas persoas honestas; cun compromiso cos espazos colectivos demostrado, e que vai máis aló do eido universitario. Dúas persoas novas e con empuxe para liderar proxectos. Só un pode gañar.
Postos a comparar e a calibrar propostas, non podo deixar de lado a miña condición de economista e os traballos e informes que teño asinado en materia de financiamento universitario e sistema de innovación galego. Cando fago tal, non podo deixar de manifestar unha certa inquedanza polo carácter secundario que ten o económico-financiero no enfoque de Xaime Cabeza. A conxuntura actual obriga a todo o contrario: a ter un cérbero que garanta a austeridade na xestión, a ser convincentes e firmes na negociación do novo plan de financiamento coa Xunta de Galicia e extraordinariamente activos na busca de financiamento privado (empresarial) e público (máis aló das fronteiras galegas). En definitiva, a contar cun equipo económico potente a carón do reitor.
Doutra banda, e vencellado ao anterior, creo que os campus do sur deben profundar na súa artellación co sistema de innovación galego, como instrumento para capturar recursos e como fin para lexitimar o apoio financeiro público que reclamamos. Xusto na liña do que se propón no actual Plan Autonómico de I+D+i que coñece ben Salustiano Mato. Alomenos dende a (cecáis estreita) perspectiva dun economista, a escolla vén de seu.
REDUCIR TEXTO »
