Durante o franquismo o código penal era explícito: constituía delito o feito de os funcionarios recibiren agasallos, regalos ou retribucións de particulares en razón do seu cargo. Ententendíase como funcionarios os propiamente ditos ou sexa empregados do estado e das administración públicas e tamén a totalidade dos cargos políticos. Este delito recibía o nome de "cohecho".
Deuse un caso famoso no que o "cohecho" foi perseguido pola xustiza. Era alcalde de Vigo Rafael J. Portanet quen ordenou de substituir a compañía de travanvías polas VITRASA de autobuses. Na operación estaba apoiado nas alturas polo moi poderoso xeneral Alonso Vega, con intereses económicos nos autobuses. Opúxose á alcaldada dun grupo de concelleiros rebeldes e dirixidos de xeito lúcido e implacábel polo xurista Arturo Estévez Fillo.
Houbo investigación da fiscalía (Conde Pumpido Pai) e parece ser que se descubriu que os concelleiros pro-Portanet recibiran un regalo de VITRASA. Este consistía nun reloxio de pulseira para as súas esposas. A cousa de tal regalo eu vin cos meus propios ollos como entraban presos na cadea de Príncipe o primiero tenente de alcalde e o grupo de concellais franquistas afectos a Portanet. Como escribo de memoria e a memoria é moi inconstante e insegura, non me atrevería a describir eiquí o desenlace do asunto penal. O que si que sei é que Portanet non foi procesado (era "procurador en Cortes" e "consejero nacional del Movimiento"). Finalmente, a compañía de tranvías, de capital galego e vigués, foi expulsada de Vigo e o transporte municipal foille concedido á empresa de Oviedo que hoxe o explota e ve, convocatoria tras convocatoria, renovado o seu monopolio in aeternum. Nós a isto decimoslle colonización.
Naquel tempo todos soubemos que era constitutivo de delicto o feito de que os funcionarios e políticos recibisen regalos, aínda que fosen mínimos. E tamén as xentes de ben foron conscientes de que, desde o punto de vista ético, a tal era unha práctica indecente. Á vista do que leo na prensa a propósito do ´caso Gürtel´ penso que se cadra o actual código penal español permita que os funcionarios e políticos reciban sen sairse da lei agasallos dos seus agradecidos administrados. Non sei. Do que si que estou seguro é de que a práctica do "cohecho" é moralmente desprezábel. Por iso, cando Rita Barberá ou Mariano Rajoy defenden e apoian a conducta dun seu correlixionario que aceptou regalos en función do seu cargo están a se retratar de corpo enteiro. E estamos a falar de traxes feitos a medida.
No Museo Nacional de Dublín hai unha sala na que se exhiben os agasallos de Estado que recibiu o presidente De Valera, propiedade da República. Entre eles figura un torques galaico de ouro (feito por Malde) que Franco lle regalou ao patriota irlandés en ocasión dunha visita oficial. En que vitrina pública de España se exhiben os regalos de Estado recibidos por Franco? Así é a moral católica da dereita española: De Franco a Portanet, de Portanet a Rajoy e a Camps. Nada que ver con Angela Merkel e coa ética protestante que nos explicara Max Weber, tan ben.
AUMENTAR TEXTO »
REDUCIR TEXTO »
