As digresións de Fino Lorenzo

 

Manuel Bragado

Acaba de inaugurarse na Casa das Artes "Fino Lorenzo. Digresións (2004-2008)", unha das exposicións máis interesantes das montadas na cidade ao longo deste último ano. Unha mostra potente, de clara intencionalidade transgresora, que abre un vieiro sorprendente na obra deste artista baionés de formación autodidacta e afouteza desmedida para reinventarse en cada unha das súas etapas creativas. Pintor de raigame figurativa durante o inicio da década dos noventa (os seus óleos de grande formato decoran algúns dos locais vigueses máis emblemáticos), acuarelista heterodoxo de técnica depurada (nestes mesmos días expón, tamén, o seu traballo máis recente na galería de Andrés Amor), recoñecido ilustrador de libros infantís (pioneiro na utilización da técnica da colaxe e da composición fragmentaria), Fino Lorenzo, tras catro anos de duro traballo no seu estudio de Borreiros, dá un paso decisivo na súa aposta pola abstracción como camiño na procura da esencia do equilibrio.
En sesenta obras, empregando soportes e técnicas moi diversas (dende construcións escultóricas, realizadas con materiais pobres, pasando por esculturas en caixas e colaxes, ata teas de grande formato), Fino presenta a exposición máis ambiciosa e completa de todas as que ten realizado. E faino propoñendo ao espectador un xogo sorprendente polas traxectorias que dispón o azar e pola procura da complexidade agachada nas estruturas máis sinxelas. Nunha aposta valente por un novo grafismo escultural, o artista rescata a beleza da xeometría na sutura improvisada destes elementos de desfeita e do cromatismo das capas e das texturas dos seus óleos.
Con esta intención, nun grande mesado, situado no centroda planta baixa da Casa das Artes, Fino dispuxo as pezas escultóricas -caligrafadas con elementos moi fráxiles (anaquiños de caixas de cartón, fíos metálicos e de nailón, gomas, varas de madeira, lapis, tubiños plásticos, redes, espirais de cadernos, cables, papeis transparentes...)- coa intención de explorar os equilibrios case imposibles de volumes planos e as densidades dos espazos creados por estas liñas rescatadas do cotián. As variacións de orientación dos elementos e un coidado traballo coa escala e cos tamaños amosan nestas esculturas, nas que se xoga cos límites imprecisos do efémero, a aspiración do artista por atopar a construción básica como ADN que expresa o permanente conflito entre a tensión e a frouxidade, entre o equilibrio e a rotura.
Como outra volta de torca a este traballo de volumes en liña, o artista ofrece unha segunda serie de pezas escultóricas presentadas en caixas e intercaladas entre os óleos. Agora, nestas esculturas -aparentemente planas, mais absolutamente novidosas- os límites do marco e a presenza dalgúns fondos de cor axudan a densificar os volumes e a crear novas profundidades e equilibrios en aparencia máis estables. Aquí, nestes haicús visuais mínimos encadrados, Fino remite en pezas memorables, como as tituladas "Caligrafía" (homenaxe ao xenial calígrafo galego-cubano Lázaro Enríquez) ou "Os amores do calígrafo e trapecista", á poética da fraxilidade e ás posibilidades de crear harmonía no seu xogo con materiais reciclados.
No entanto, a síntese desta proposta, atópaa Fino na terceira serie das súas pezas, as colaxes sobre papel vexetal e os óleos, técnica que recupera despois de abandonala hai bastantes anos. Como variante do traballo volumétrico anterior, nestas teas o tránsito ao plano concíbese como espazo para abordar a profundidade proporcionada por texturas, moi traballadas en capas, que se superpoñen en cadencias de improvisación, remitindo a un virtuosismo jazzístico do que tanto gusta o pintor miñorano. Nesta serie, na que hai unha profunda pegada musical (Schönberg, Freddie Freeloader, Dexter Gordon, Monk son algúns dos músicos homenaxeados), o xogo co azar e co mcguffin matízase coa utilización da regra dunha paleta cromática bastante austera. Esta fórmula permítelle a Lorenzo continuar explorando sobre o soporte plano o ámbito da digresión, ou desvío de puntos móbiles respecto a un eixo ou puntos fixos, eixo temático de toda esta concienzuda e transversal proposta expositiva.
Como sinala o editor Francisco Villegas, autor do fermoso texto introdutorio do catálogo, nestas digresións de Fino Lorenzo, sexan baixo a forma de esculturas ou pinturas, "a liña transfórmase en plano e o espazo-historia na base sobre a que se constrúe de novo a liña", pechándose así o círculo do azar e da improvisación. Paga a pena visitar esta proposta tan novidosa (está aberta ata o 13 de xullo). É, ademais, unha magnífica oportunidade para coñecer e gozar da obra dun dos nosos artistas máis interesantes e con maiores posibilidades de proxección internacional.
bretemas@gmail.com

 

Galicia

Alumnos de ESO aprenderán en el aula los peligros de internet

Alumnos de ESO aprenderán en el aula los peligros de internet

-Recibirán pautas para controlar lo que divulgan de sí mismos y de otros -Una materia les instará...

Galicia registra cada día 1.160 multas de tráfico, solo superada por Andalucía y León

Galicia registra cada día 1.160 multas de tráfico, solo superada por Andalucía y León

Se consolida como la tercera autonomía con más denuncias tras ocupar varios años el sexto puesto...

La vuelta al "cole" se recicla

La vuelta al "cole" se recicla

Las asociaciones de usuarios aconsejan reutilizar y recurrir al intercambio y a las marcas blancas...

La DGT inicia el lunes una nueva campaña de control de velocidad

La DGT inicia el lunes una nueva campaña de control de velocidad

Los controles incidirán especialmente en las carreteras convencionales y vías urbanas

Casi un millar de "sin papeles" se acogen al plan de sanidad gratuita

Casi un millar de "sin papeles" se acogen al plan de sanidad gratuita

Desde que perdieron el derecho a tarjeta en 2012, más de 3.800 irregulares recurrieron al programa...

Calendario laboral y escolar 2016/2017

Calendario laboral 2017 en Galicia

Calendario Laboral 2017 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2016/2017 .

 

Enlaces recomendados: Premios Cine