A descuberta do galego aos meniños nunha viaxe de imaxes e sons

A. ABAD DE LARRIVA O branco e o negro, mistura e ausencia de cor, foron engadindo devagariño outros tons en liñas sinxelas de conxunción cromática musicadas. O chucuchú dun tren chamou a máis de 600 persoas, que converteron as dúas sesións especiais da Festa dos Axóuxeres, celebradas onte na Praza do Rei, nun “éxito”, en palabras da organización e á vista do público asistente.
A viaxe dun monicreque azul, Totó, na procura do seu amigo Pope, captou a atención dos meniños durante máis dunha hora, grazas ao acompañamento musical e as formas divertidas dos elementos do escenario. O acto, organizado pola Secretaría de Política Lingüística, desenvolveuse dentro dunha carpa habilititada para o mergullo absoluto das familias nun mundo de ilusión e agarimo polo galego. Os carriños dos cativos quedaron aparcados, á beira dos zapatos, fóra, para achegar unha comodidade de casa, sentados nunha lona branca mol e suave.
A figura do axóuxere foi central, xa que o carteiro que informaba a Totó de onde se agochaba Pope levaba un destes simpáticos xoguetes enriba. Así, despois dunha incríbel viaxe por catro elementos –terra, mar, aire e sol–, musicados por catro ritmos dinamizadores –rhythm and blues, soul, bluegrass e fussion–, o bater do contido dos axóuxeres que repartira o simpático emisario entre os nenos trouxo de volta a Pope. A aparición deste foi un auténtico éxito, xa que o boneco de 2 metros de alto, amarelo e cun bandullo branco, peludo e feitiño, encantou os rapaces.
A sinxeleza caracterizou este achegamento natural da lingua galega aos máis pequenos. As figuras eran doadamente recoñecíbeis: os vermes, os peixes, os marcianos e as bolboretas, e as cancións semellaban quedar penduradas no ouvido.

Descargas e sorteos

As pezas interpretadas no espectáculo pódense escoitar e descargarse en internet, así como outras informacións sobre o programa. Agora tamén é posíbel conseguir un lote de produtos de lecer nun sorteo no que se entra só con emitir unha opinión sobre o espectáculo. Faise todo isto na páxina web da festa, no seguinte enderezo: www.xunta.es/linguagalega/axouxeres.
Para os aínda non o coñezan ou os que queiran repetir, o evento trasládase a próxima fin de semana a Santiago de Compostela, tamén con dúas sesións especiais –ás 12.00 e ás 17.30 horas. Despois, en outubre, iniciarase un percorrido de dous meses por doce vilas galegas, para ofrecer unha versión do evento en espazos máis reducidos e próximos ao público.