Sempre queda alguén por diante

Estou bastante contento coa miña actuación en Sierra Nevada pero quédame esa espinita de ter sempre a alguén por diante que non me permite lograr esa victoria de etapa tan desexada.
Foi unha subida moi esixente, moi longa xa que estivemos case unha hora e media neste porto. Teño que recoñocer que nas primeiras rampas non esperaba facelo tan ben como saíu despois pero por sorte funme coidando ben, comendo e hidratándome moito, porque como non o fagas pode darte unha páxara monumental que tira pola borda todo.
É normal que algúns favoritos sufriran porque pasaba factura ó corpo, íamos ó límite. Sorprendeume Evans, que sen non chega a ser polo pinchazo que sufriu parecía que ía con bastantes forzas. Do resto, Cunego e Danielson cederon pronto polo que puiden recuperar tempo e postos na clasificación xeral, e ir progresando pouco a pouco que é moi importante.
Penso que chegar ó podio é posible pero permanecer vai ser moi complicado porque temos a crono de penúltimo día, que aínda que é máis corta ca outra, sempre vou perder tempo cos meus rivais, que son máis especialistas na loita contra o reloxo, pero bueno, eu vou intentalo ata ó final.
O equipo está realizando unha gran actuación nesta Vuelta. Temos o obxectivo da xeral, pero non imos renunciar a meternos en fugas para buscar algunha victoria máis de etapa. Homes como Gustavo César Veloso van estar sempre aí.
A xornada de mañá (por hoxe) vai ser moi dura pero polo menos espero poder facelo como o fixen hoxe (por onte). Temos o perigo de que as previsións dan chuvia e iso sempre é un hándicap para todos. A Pandera é un porto máis corto que Serra Nevada pero tamén un pouquiño máis duro e vai ser unha xornada moi compricada de afrontar, pero aí estaremos.
Vexo muy bien a Alejandro Valverde. Hoxe (por onte) era o que mellor ía, controlando e manexando a situación con moita calma e seguridade. Está mentalizado coa posibilidade de levarse por primeira vez a victoria nunha gran proba por etapas e está coidando todos os detalles. Sobre todo, cuídase de non ter un día malo como lle pasou en anos anteriores e o está conseguindo. Sempre lle pasaba algo pero agora se lle ve forte e vai ser moi difícil que se lle escape o triunfo final. Está moi mentalizado e metido na proba.