Dous mozos de Vigo e unha de Bueu tocarán coa Real Filharmonía de Galicia

Irene Parada, Jaime Estévez e Estefanía Cereijo actúan como solistas coa orquestra este venres no Audotiorio de Galicia en Santiago ás 20.30 horas

21.09.2016 | 02:01
A frautista viguesa Irene Parada. // Faro

O VI Festival Internacional Peregrinos Musicais, cuxa finalidade é apoiar a novos talentos galegos, clausúrase este venres cun concerto coa Real Filharmonía de Galicia (RFG). A orquestra, dirixida nesta ocasión polo seu director asociado, o mestre compostelán Maximino Zumalave, acompañará a músicos noveis de Galicia e tamén procedentes dos Países Baixos, Rusia e Estados Unidos. A cita terá lugar ás 20.30 horas no Auditorio de Galicia.

Do total dos 17 mozos que foron seleccionados para participar nesta edición do festival, todos eles entre 12 e 21 anos de idade, escolléronse a 8 para intervir como solistas neste concerto coa RFG. Trátase dos galegos Irene Parada, frautista de Vigo de 19 anos; Jaime Estévez, saxofonista de Vigo que vive en Baiona, que aos seus 15 anos é o músico máis novo dos galegos seleccionados para este certame; e de Artur Carballo, clarinetista natural de Culleredo que actualmente reside en Ámsterdam, de 20 anos; xunto con Estefanía Cereijo, pianista de Bueu de 21 anos.

Ademais, procedentes de Rusia participarán o pianista Phillipp Rudenko e a violinista Polina Senatulova. Dos Países Baixos contarase con Ramon Van Engelenhoven ao piano e dos Estados Unidos con Carrie Chen tamén ao piano.

A viguesa Irene Parada será a encargada de abrir o concerto. Parada estuda no Conservatorio Superior de Música de Vigo a especialidade de frauta traveseira. Xa gañou algún certame de música, ten tocado con varias agrupacións mesmo como solista.

Compartir en Twitter
Compartir en Facebook
Enlaces recomendados: Premios Cine