A cita mundial do cinema de animación acolle o filme galego "Memorias dun home en pixama"

Trátase da versión en celuloide da banda deseñada homónima de Paco Roca, que se presentou onte no Festival de Annecy en Francia

16.06.2016 | 02:05
Unha das viñetas de "Memorias dun home en pixama". // Paco Roca

Conta con parte do equipo que lograra o éxito, anos atrás, de Engurras. Falamos de Memorias dun home en pixama, a adaptación a cine da banda deseñada de Paco Roca que conta con ampla participación galega e que onte foi presentada no Festival de Annecy, en Francia, a principal cita mundial para os filmes de animación. Outras dúas obras galegas concorren este ano alí: Psiconautas e Decorado, ámbalas dúas de Alberto Vázquez.

No caso de Memorias dun home en pixama, preséntase a historia dun cuarentón coas súas anécdotas vitais cotidiás. Na produción, figura o galego Ángel de la Cruz e como director o tamén patrio Carlos Fernández. A produtora galaica Ladybug Films traballa neste proxecto coa catalá Dream Team Concept.

A película deuse a coñecer, segundo informa Agadic, Axencia Galega de Industrias Culturais, no MIFA Pitches, programa de 'pitching' do mercado do festival a través do que se dá a coñecer unha escolma dos mellores proxectos orixinais a nivel internacional. Esta é, ademais, a única longa española entre a vintena de títulos de diferentes formatos seleccionados para esta sección, á que optaban máis de 400 proxectos.

Outra longametraxe galega, seleccionada para o Annecy pero non para asección de "pitches" foi Psiconautas, os nenos esquecidos, que compite na sección oficial do festival e se está a exhibir durante toda a semana en diferentes salas da localidade francesa. O coruñés Alberto Vázquez codirixe xunto a Pedro Rivero este título, que xa conta con premios á mellor longametraxe de animación nos festivais de Stuttgart (Alemaña) e Golden Kuker-Sofia (Bulgaria).

Alberto Vázquez foi seleccionado, así mesmo, na sección oficial de Annecy coa curta Decorado, que acaba de estrear na Quincena dos Realizadores do Festival de Cannes.

Compartir en Twitter
Compartir en Facebook
Enlaces recomendados: Premios Cine