Produccións audiovisuais galegas centran un ciclo en Redondela

I.L.M. / REDONDELA Dar a coñecer a producción audiovisual galega máis recente é o obxectivo do ciclo "Real Galician Cinema", que por terceiro ano organizou o Concello de Redondela a través do departamento de Normalización Lingüística. A responsable desta área, a concelleira Ángeles Babarro, salientou onte na presentación da actividade que esta "supón unha aposta pola xente que pensa e traballa en galego" no campo audiovisual. O ciclo terá lugar no Multiusos do Paseo da Xunqueira en dúas xornadas, mañán e o vindeiro venres, en ámbolos dous casos a partir das 20.30 horas. A entrada é de balde. As proxeccións irán seguidas dunha charla-coloquio entre os asistentes e varios dos directores das obras que se presentan.
Programa
Durante a primeira xornada, mañá venres, proxectaránse as curtametraxes "Cousas de Kulechov" (2006), de Susana Rei; "Conversas con Deus" (2007), de Lara Bacelo; e "A flor máis grande do mundo" (2006), de Juan Pablo Etcheberry.
A curtametraxe de Susana Rei, "Cousas de Kulechov", ven de gañar o galardón á mellor curta galega no Festival Internacional de Curtametraxes de Santiago de Compostela.
Trátase dun falso documental que fai un percorrido pola paisaxe, costumes e actualidade galegas presentando un suposto conflito bélico onde un exército invasor ataca as costas galegas.
A curta de Lara Bacelo, "Conversas con Deus", recibiu o premio do público á mellor creación galego-portuguesa na Mostra Internacional de Videocreación do Condado. O seu traballo é unha aproximación fílmica a unha personaxe literaria real do Concello de Ponteareas.
O programa desta primeira xornada completarase coa proxección da curtametraxe de animación "A flor mais grande do mundo", baseada no único conto para nenos escrito por José Saramago.
O ciclo continuará o venres 30 de novembro coa proxección de "Bs. As." (2006), un filme no que o director, Alberte Pagán, conta a historia dos seus familiares na Arxentina.