A plataforma "Queremos galego no Baixo Miño" afirma que o idioma non é un conflicto

E.G. - TOMIÑO A plataforma "Queremos galego no Baixo Miño" se da a coñecer animando a toda a poboación a mobilizarse en defensa do idioma, "pois non é un conflicto". O músico guardés Tino Baz, é o portavoz e informa que a plataforma se constitúe cunha "pretensión de estabilidade no tempo". Encara como primeiras actividades a promoción no Baixo Miño da manifestación que o próximo 18 de outubro se celebrará en Santiago de Compostela, para respostar "ás agresións que o actual goberno da Xunta está levando adiante contra o noso idioma e a nosa cultura", di no seu comunicado, referíndose a política lexislativa como é a anulación do decreto do galego nas aulas ou a eliminación da proba do galego nos exames a postos na Administración. A plataforma asume no Baixo Miño a difusión da Iniciativa Lexislativa Popular "para que se respecten os nosos dereitos lingüísticos e para que a Administración garanta os usos públicos do galego". Agrupa a una trintena de colectivos de diversa índole, e a persoas que están a título individual, entre elas o guitarrista Tomás Camacho e o pintor Xosé Luís de Dios, entre outros. Deste xeito fai un chamamento para a integración das entidades que compartan afinidades e obxectivos con "Queremos galego".