Un curso ensinará cociña aos nenos de Redondela

REDACCIÓN - REDONDELA A Concellaría de Servizos Sociais e Igualdade, dirixida pola nacionalista Rosa Costas, seguindo coas súas liñas de traballo pola infancia e pola saúde, organiza unhas xornadas de "Cociñar coa infancia".
Con esta actividade quérese iniciar ás nenas e nenos de Redondela nos bós hábitos de alimentación, aprendéndolles receitas sinxelas e saudables, así como mostrándolles a importancia dunha boa alimentación de cara a manter boa saúde e previr enfermidades. Ao mesmo tempo trátase de fomentar a igualdade entre nenas e nenos e a importancia de compartir as tarefas do fogar.
A encargada de impartir este cursiño será a cociñeira Elena Argüello, que xa participara nunha Xornada sobre alimentación saudable que dende esta Concellaría se organizou a mediados de xuño.
As xornadas desenvolveranse os días 10, 11 e 12 de agosto, para nenas e nenos con idades entre os 8 e 12 anos, e o día 13 de agosto para nenas e nenos de 4 a 8 anos. O horario será de 10 a 12 horas, no Multiusos de Redondela.
Para participar é precisa unha inscrición previa chamando ao teléfono 986 40 26 08.