cartas al director

Cara a Sociedade do Coñecemento Galega

26.04.2016 | 05:21

A Xunta de Galicia ven de anunciar a implantación do Grao en Enxeñaría Aeroespacial no campus de Ourense de cara ao vindeiro curso académico 2016-17. Ao estar íntimamente vencellado á investigación, desenvolvemento e innovación, o sistema universitario de Galicia gaña potencial en educación superior, diferenciada da estrita prolongación da educación secundaria na Universidade ou educación terciaria.

A Aeroespacial é unha prestixiosa enxeñaría cunha base moi ampla en Física e Matemáticas. A posta en marcha destes estudos leva aparellada unha política industrial moi decidida. En efecto, a RIS3, unha estratexia de especialización impulsada pola UE en materia de desenvolvemento e innovación na que cada rexión está chamada a concentrar os seus esforzos nun número limitado de áreas, sitúa a Galicia como "provedor da industria aeronáutica". Por outra banda, Galicia non empeza de cero na investigación neste eido xa que, a través da súa Agrupación Aeroespacial, a Universidade de Vigo leva casi unha década realizando un traballo moi destacado coa posta en órbita xa de tres satélites e o desenvolvemento doutras liñas.

Cómpre, polo tanto, salientar o bo facer dos nosos gobernantes e representantes institucionais, pois correspóndelle a eles velar pola complementariedade das políticas académicas e as políticas tecnolóxicas e industriais así como por unha mellor armonización do sector público e do privado. O artellamento destes aspectos contribúe a camiñar cara unha sociedade do coñecemento galega, a saber, unha comunidade que emprega o coñecemento como unha das súas ferramentas básicas para o progreso e o benestar ao mesmo tempo que potencia a riqueza cultural e lingüística de Galicia así como calquera outra faceta tradicional da nosa terra.

Naturalmente, nunha sociedade do coñecemento son de importancia capital a educación primaria, secundaria, terciaria e superior. Esta última é a que conduce directamente a ciencia e tecnoloxía. E ámbalas dúas forman parte da esencia deste mundo globalizado de século XXI que discorre inexorablemente ao ritmo que se xeran novos descubrimentos e, como consecuencia, novas tecnoloxías, a principal diana do emprego. Deste xeito, as expectativas laborais do persoal especializado na fronteira da ciencia e a tecnoloxía son moi alentadoras, pero tamén cabe prever que un dos profesionais do futuro será aquela persoa cunha formación de base sólida que lle outorgue a flexibilidade necesaria para adaptarse rápidamente ás demandas dun mercado laboral en constante evolución. Así pois, a consistencia e fiabilidade dun sistema de educación superior pasan por manter a vitalidade das disciplinas mais básicas así como por fortalecer e actualizar continuamente os programas enfocados ás aplicacións de vangarda.

Calquera que bote a vista atrás ao nacemento do sistema universitario de Galicia hai pouco máis de 25 anos queda estupefacto ao comprobar cómo ten mudado o mundo que nos rodea. Nembargantes, este sistema universitario conserva básicamente o seu statu quo orixinal. Urxe, polo tanto, un reimpulso na procura dunha resposta óptima aos retos actuais e futuros. Malia a incorporación de Enxeñaría Aeroespacial, faltan titulacións a nivel de grao como, entre outras, Biotecnoloxía, Bioquímica, Enxeñaría Biomédica, Enxeñaría Biolóxica, Enxeñaría Física ou Enxeñaría de Materiais. Por outra banda, é imperativo situar aos posgraos, ou másteres, como o que realmente son no resto do mundo: o segundo ciclo formativo que, ademáis, proporciona a chave ao doutoramento e á investigación. Efectivamente, co insuficiente investimento do estado español en I + D como telón de fondo, o déficit en estudos de grao dirixidos ás novas tecnoloxías e a precariedade dos másteres están a constituir un problema cada vez mais delicado que, de non ser afrontado coa dilixencia que merece, contribuirá a agravar a situación actual de emigración xuvenil forzosa, de xeito que a lacra que constitúe a fuga de cerebros abrirá aínda máis a brecha científica e cognitiva con outras comunidades autónomas mais puxantes e cos países máis desenvolvidos.

Correspóndelle aos máis de 5000 docentes e investigadores distribuidos nas nosas tres universidades asumir a iniciativa nestas cuestións. Quén somos nós e por qué haberíamos de pronunciarnos nestos termos? Como unha de tantas voces deste país que claman para que a Universidade pública estea ao servizo da sociedade que a financia e non ao duns poucos dos que nun momento dado das súas vidas están traballando nelas, a Plataforma Pro Campus, unha plataforma cidadá, xurdiu hai preto de 30 anos co obxectivo de evitar que, por falta de miras, o campus de Ourense fora privado dunha estrutura razoable en educación superior, logrou congregar dende entón á sociedade ourensá arredor desa idea e as súas actividades tiveron como momento álxido unha memorable macromanifestación de 25.000 persoas en 1994, a maior da historia da provincia.

Agora, ben entrado o século XXI e superadas moitas barreiras que xa forman parte do pasado, os nosos sete campus deben consolidar modelos que mesturen educación superior e educación terciaria dun xeito equilibrado, implementando continuas melloras que proporcionen mais oportunidades que fagan que Galicia, a sexta comunidade autónoma en PIB e coas súas universidades ben situadas nos rankings nacionais, poida aspirar a ser referencia universitaria do noroeste peninsular. Propósitos como este contribuirán notablemente ao avance cara o ideal de sociedade do coñecemento galega que, conforme ás directrices da UNESCO, estamos na obriga de perseguer.

Compartir en Twitter
Compartir en Facebook
S.P.
Lo malo del embrollo que ha montado la Xunta con la sede de la fundación...
MANUEL BRAGADO
Vigo contou cun gran teatro en 1832. Foi o que na Princesa inaugurou o rico comerciante Velázquez Moreno...
 

Calendario laboral y escolar 2016/2017

Calendario laboral 2017 en Galicia

Calendario Laboral 2017 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2016/2017 .

 

Enlaces recomendados: Premios Cine