As cousas son. É o que hai. Ditos de manual, e non pensar demasiado, nin sequera nada, nin remexer as ideas un ápice. Estar ó momento, que outra queda ademais de vivir o inmediato? Sen calendario nin previsión a longo prazo. É agora, surfear na crista da onda, na escuma que dura o que dura e xa un relevo atrás dela. Praia en instantes de acopio e anda.
A mente tende, igual que as empresas, á deslocalización, vidas de outros, historias alleas vividas e prestadas -como compartir textos en soidade-. É un "bluff" ó igual que tantos castelos no aire. A cabeza está a levantar castelos faltos de base cada segundo, e estican toda a vida, en casos. A capacidade de baleirar o pensamento, destila a percepción pura, un non pensar alén do estrictamente inmediato, cubrir as necesidades e fóra, con conciencia do efímero e transitorio.
A data atrapa ó cidadán, nas follas e noticias do xornal, un lector avanza polo artigo ou a columna de opinión a sortear os caracteres, os puntos e comas. As noticias resumen a vida, anacos, porción, retrincos de realidades contidas nas liñas. As noticias levan a existencia despegada por lectores ávidos. Hemerotecas.
