cartas al director

A escola do "Marchabén"

30.12.2015 | 03:21

Así era como se chamaba o primeiro colexio público masculino da parroquia de Reboreda (Redondela). Foi inaugurado en 1925 nunha casa situada no lugar da Banda do Río, no barrio de Santo Paio de Abaixo. Hoxe o sitio chámase Estrada de Pazos de Borbén, por decisión, no 2010, duns concelleiros/as e dos seus asesores, uns "lumbreras" que non sabían que os nomes dos lugares, a toponimia, representa a cartografía da palabra na terra, non sabían que os que teñen presente e respectan a súa identidade demostran a súa sabedoría.

Nesta casa, digo, alugada polo Concello no seu día a Severiano Bastos "O Marchabén", un personaxe singular e home de moitos oficios, entre eles o de carreteiro e muiñeiro, estivo a escola de nenos desde 1925 ata 1965, ano no que se estreou o actual grupo escolar. Un primeiro andar dunha casa de 70 m?2; ao carón do muíño do mesmo nome pola que pasamos centos e centos de nenos da parroquia durante os 40 anos do seu funcionamento. Alí impartiron clases don Prudencio, don Manuel Cerviño e don Fermín Blanco. Ata 60 alumnos de diferentes idades para un só profesor. Unha aula adobiada, despois de 1939, coa fotografía de Franco, a de José Antonio Primo de Rivera, un crucifixo e a bandeira española. Era unha escola, ben se sabe, parcial e totalitaria, como a ditadura que nos gobernaba: pobre en tódolos sentidos, na que se dicía que "a letra con sangue entra". Na mesa do profesor estaba sempre presente unha regra de madeira para arrearlle "palmetazos" na man a quen os merecese e tamén un vimbio dun metro de longo para castigos máis severos. Outros enseres, ademais dos pupitres, eran unha cociñiña eléctrica, unha ola de aluminio de 15 litros para facer o leite en po que nos daba o profesor todas as mañás e un armario para gardar os 60 tanques de porcelana pola que o tomabamos. Dous alumnos encargabámonos cada día de ir á fonte do "Marchabén" a por auga coa mesma ola de cociñalo.

O luns aritmética, o martes gramática, mércores xeografía, xoves historia e o venres relixión. Pizarra e pizarrillo (lémbrame o amigo Jacinto Castro o lugar onde os afiabamos tódolos días: nun balaústre do pasamáns da rampla das escaleiras de acceso á aula), caderno, pluma e o libro, en moitos casos o libro-encicolopedia que lle correspondese a cada un dependendo da idade. Así ata os 13 ou 14 anos, para conseguir o Certificado de Estudos Primarios. En moitos casos aquela viaxe tería continuidade, pasado un tempo, ata obter o Graduado Escolar. Finalmente matriculámonos na escola da vida, que tamén é indispensable para adquirir sabedoría fóra das aulas.

Con todo, como sabemos que o coñecemento do noso relato vital, así como do noso relato colectivo, é o que nos pode dicir o que fomos no pasado, e mesmo o que somos no presente, como neste ano de 2015 se cumpren nove décadas da fundación do primeiro colexio público desta parroquia, non queremos que se perda a memoria de onde vimos porque sabemos que é unha facultade da nosa natureza que pode considerarse marabillosa para poder mellorar o futuro? As asociacións culturais Alén Nós de Redondela, a Sociedade Cultural de Reboreda, o Colexio Público da parroquia e a Concellería de Cultura do Concello organizaron un acto de memoria o pasado día 26 de decembro diante da casa onde estivo esta primeira escola.

No mesmo acto descubríuse unha placa na fachada da casa en memoria e recoñecemento do profesorado e alumnado que pasou por esta escola, ao cumprírense 90 anos da súa creación.

Compartir en Twitter
Compartir en Facebook
S.P.
Lo malo del embrollo que ha montado la Xunta con la sede de la fundación...
MANUEL BRAGADO
Vigo contou cun gran teatro en 1832. Foi o que na Princesa inaugurou o rico comerciante Velázquez Moreno...
 

Calendario laboral y escolar 2016/2017

Calendario laboral 2017 en Galicia

Calendario Laboral 2017 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2016/2017 .

 

Enlaces recomendados: Premios Cine