Inodoros e filósofos andamos de festa

24.11.2015 | 04:55

Algún amigo lector estrañarase seguramente, se é que antes non estivo case tentado de se rir a cachón, lendo un enunciado dese cariz. E iso que minorei un chisco o impacto visual (e auditivo) do mesmo ó utilizar a fina expresión de inodoro no canto da máis directa e sonora de retrete. Pois que teñen que ver os venerábeis filósofos co retrete máis alá de que tamén eles, aínda que profesen o idealismo máis depurado e abstracto, de cando en vez teñan que facer uso del? Non pretendo forzar artificialmente as cousas nin de poñelas en mutua relación sen vir ó caso, pois foron altas instancias internacionais as que construíron de feito esta relación e aí está ela solemnemente entronizada desde entón. Resulta que os que simpatizamos coa tarefa da filosofía levamos celebrando desde hai xa dez anos aínda que coa necesaria sobriedade o noso Día Mundial da Filosofía no 19 deste mes de novembro e agora, desde hai nada máis ca dous anos, xuntáronse a nós os que nesta mesma data festexan o Día Mundial do Retrete. Así, tal como soa. Pois benvidos sexan, abofé! Alédome moito dos novos compañeiros. Así como os interesados na reflexión filosófica reclamamos o fomento e apoio dun necesario pensamento crítico, lúcido e independente, ameazado con frecuencia na súa mesma existencia por espurios intereses económicos e de poder, reclaman eles con toda razón algo aínda máis elemental, concreto e urxente: a posibilidade de a xente dispoñer de inodoros ou retretes dos que aínda carecen millóns de persoas neste noso mundo actual, tan abismalmente dividido entre ricos e pobres, coas moi prexudiciais consecuencias que de tal situación se derivan. Mais coido que máis alá diso nos une a ámbolos dous celebrantes a denuncia da inmundicia coa que nos ensucia tanta corrupción, violencia e opresión como aínda campan polo mundo adiante, sen que pareza polo que se ve que vaia ir a menos. Reclamamos para iso (aínda que só sexa unha vez ó ano) unha seria toma de conciencia e un decidido esforzo común polo afloramento dunha maior abundancia de augas claras e limpas, as da intelixencia crítica e as do fomento e respecto da dignidade humana, que nos liberen de tanta lorda física e moral procedente da degradación ambiental e da humana, tanto no noso mundo exterior coma no interior das conciencias.

Compartir en Twitter
Compartir en Facebook
S.P.
Lo malo del embrollo que ha montado la Xunta con la sede de la fundación...
MANUEL BRAGADO
Vigo contou cun gran teatro en 1832. Foi o que na Princesa inaugurou o rico comerciante Velázquez Moreno...
 

Calendario laboral y escolar 2016/2017

Calendario laboral 2017 en Galicia

Calendario Laboral 2017 en Galicia

Aquí tienes a tú disposición todos los días festivos en  Vigo y en Galicia , así como el Calendario escolar 2016/2017 .

 

Enlaces recomendados: Premios Cine