Todos sabemos que a Universidade é unha institución de primeirísimo orden para o desenvolvemento dun pobo, dunha rexión ou de calquera área socioeconómica, neste caso importantísima para a área de Vigo e do Sur de Galicia. Tan importante que a súa creación marcou un antes e un despois na vida desta cidade.
Pois resulta que a Universidade de Vigo ten un rector, pero dase o caso que este home non debe ser vigués ¿ou sí?
Pódese ser vigués de nacemento ou de adoución pero sobre todo ese vigués de corazón, o que significa querer a esta cidade con paixón, defendela sempre e loitar polo seu engrandecemento e esplendor.
Polo visto, e polo que está a acontecer nestes intres, habería que preguntarse seriamente pola verdadeira identidade do tal rector, xa que cando outros están poñendo no asador tódala carne e máis (e non só no ámbito que nos ocupa) loitando polo seu, este home bendito está no limbo dos xustos a velas vir, pois nin arre nin xo.
O rector coruñés vemos que está un día sí e outro tamén saíndo nos medios de comunicación reivindicando o que el considera un obxectivo irrenunciable que non é outro que conquerir a Facultade de Medicina, sabendo como sabe que é en Vigo onde primeiro debe ter o seu emplazamento a Facultade de Medicina do sur de Galicia e non noutro sitio do norte onde xa teñen a súa. E por se fora pouco este argumento é tamén un obxectivo irrenunciable para a Universidade de Vigo porque con moita antelación xa leva pedindo a nosa universidade. Sen embargo a voz de Vigo neste eido parece ter unha afonía crónica e irreparable xa que non se lle escoita, nin está nin se lle espera.
Resulta igualmente chocante que no tema de Empresariais despáchase este home cunhas declaracións seráficas que a todos nos deixaron abraiados, en vez de defendelo a capa e espada.
Por todo, estou a pensar se non será un infiltrado coruñés na institución viguesa, posto a propósito no cargo para que os do norte poidan levar unha vez máis o gato ó seu terreo sen oposición algunha e favorecendo así os seus intereses.
¡Cando aprenderemos a defender o noso sobre todo asistíndonos toda a razón do mundo! Se loitas, podes perder pero se non loitas estás perdido.
Polo tanto do mesmo xeito que hai uns días un comunicante o facía neste mesmo diario do FARO DE VIGO, pido que se lle dea ó rector da Universidade de Vigo un suspenso cum laude pola nula defensa que está a facer dos intereses de todos nos medios de comunicación.
