Pregunta se quero que o meu fillo...

Pregunta se quero que o meu fillo aprenda a ler e escribir en galego ou en castelán.
Pero que pregunta é esa, señor conselleiro de Educación?
Quero que o meu fillo aprenda a ler e escribir en galego, pero tamén quero que aprenda en galego a cantar, a xogar, a bailar e a relacionarse coas súas profesoras e cos seus compañeiros. Quero que o meu fillo sexa normal por falar a súa lingua no seu país. E quero que o seu país fale con el na súa lingua.
Non me pregunten se quero que o meu fillo aprenda a ler e a escribir en galego, e a continuación se quero que aprenda inglés. Non estamos a falar do mesmo. Claro que quero que o meu fillo aprenda inglés, e castelán, e francés, e portugués, e todas cantas linguas poida aprender. Pero o galego non é lingua estranxeira, e vostede está a tratala como tal.
Porque temos dereito a vivir e medrar na nosa lingua no noso país,
Galeguización das escolas xa!!!