Falabamos e falabamos, eu, como afouta que non son, guindei a miña teima de que na educación levabamos coarenta anos e un día de atraso. Imos ver, non se trata das materias que se imparten, dos horarios, da permisividade dos pais, etc. etc.
Isto vai en especial para os que naceron antes de que Suárez nos deixara a todos (ou case...) pampos coa súa renuncia. Milagre! Sinto medo cando aparecen novas leis de educación ou esas escolas de pais/avós. Penso que non se vai ó miolo do asunto. A vida rolda moi deprisa e querámolo ou non, os métodos en tódolos eidos teñen que roldar tamén.
Non me veñan co dos "valores", ben sei que sempre estarán aí, pero a cuestión é moito máis complexa. Algún día alguén terá que afrontala.
Evitariamos ademais tantos complexos de culpabilidade, máis se coma min eres nai e adícaste a túa maneira (e seguramente o mellor que podes) a iso tan difícil e tan perigoso como é ensinar.
